Xixón, 24 jun (EFE).- El conseyu d’alministración de la Empresa Municipal de la Vivienda de Xixón (EMVISA) que se va celebrar el próximu xueves va someter a aprobación diverses cambeos nos programes xuveniles d’accesu a la vivienda que tien en marcha.
Les principales meyores que se proponen para’l programa “Comparte Mozu” son l’ampliación del períodu d’estancia de cinco a siete años, la eliminación de la obligatoriedá del empadronamientu, l’aumentu de la llende d’ingresos máximos a dos vegaes el IPREM y el requisitu de que solamente’l titular de l’ayuda va tener que tar al corriente de pagos coles alministraciones.
Nel casu del programa “Ayuda a Estudiantes”, van actualizase les titulaciones académiques, y modifícase, a partir de viviendes de dos habitaciones, el criteriu de cuantía máxima a financiar que ye de 200 euros per habitación.
Hasta agora’l criteriu aplicáu nestos casos yera’l preciu por vivienda, colo que munchos mozos que compartíen pisos de trés y cuatro habitaciones quedábense fora.
Tamién nesti casu propónse que solamente sía’l titular de l’ayuda quien tenga de tar al corriente de pagos coles alministraciones.
A lo último, va sometese a aprobación del conseyu un conveniu col Conseyu de la Mocedá de Xixón para algamar un meyor entendimientu de los códigos culturales, conductuales y llingüísticos utilizaos pola mocedá y ameyorar los programes empobinaos a los mozos.
Esti conveniu va dexar, por casu, la dedicación d’un trabayador del Conseyu al programa “Comparte Nuevu”, mientres 10 hores selmanales, para acompañar a los usuarios d’esti programa y para exercer de mediador nel ámbitu convivencial, vecinal y con la mesma empresa municipal.