La Conseyería de Sanidá, en collaboración col Ministeriu de Defensa, dio prioridá máxima para intentar evitar el colapsu del Hospital de Cabueñes instalando un hospital de campaña nel aparcamientu de la cortil en moviendo ayeri al anochecer la so autocovid hasta l’avenida d’Albert Einstein. L’hospital provisional va tener nueve boxes, dotaos con un equipu portátil de rayos y material pa estrayer amueses pa PCR y p’esploración básica d’enfermos. La idea, más qu’un llugar d’ingresu, ye que la nueva carpa ayude a solliviar la presión asistencial de la área d’Urxencies, enchida dende va díes énte la falta de personal.
Al pie de otres midíes yá adelantraes ayeri por esti diariu, ente elles l’apertura d’una nueva planta de positivos en Cruz Roja y la derivación d’enfermos a Fundación Avilés (antes Hospital de Caridá) y al Sanatoriu Adaro de Llangréu, la xerencia confirmó ayeri a la xunta de personal que Jove tamién s’habilitó como nuevu “hospital puercu” en Xixón. Fai yá díes empezó a ingresar el so primeres infectaos (ayeri yá raspiaba la ventena) y, casi coincidiendo coles protestes nel hospital de referencia, habilitó una segunda planta pa dixebrar por completu los casos sospechosos. Jove, hasta agora, asumía más bien l’ingresu de pacientes ensin afectar por coronavirus, una xera que va poder delegar agora a los centros d’Avilés y Llangréu, y nunca hasta agora encargárase del cuidu d’enfermos de covid-19, solo de casos sospechosos.
Tamién va haber un llixeru refuerzu de personal nes categoríes de celadores y técnicos auxiliares d’enfermería (de 4 y 15 emplegaos, aprosimao) a partir nes plantes y les UCI, una cifra que se queda daqué escasa a xuiciu de los sindicatos y que nun paez tener en cuenta a la área de Pediatría, na sesta planta, magar que dende fai yá díes atiende a más pacientes adultos que pediátricos. En cuanto al refuerzu d’enfermeres, la xera ye más complexa: les bolses d’empléu de toa Asturies tán escosaes. Enagora, la decisión foi unviar a Cabueñes a dos enfermeres del centru de salú de Puerta la Villa y otres 5 del de Pumarín, según otros nueve d’ámbitu hospitalariu qu’hasta agora trabayaben en consultes esternes, un serviciu que va quedar amenorgáu pa blindar más l’hospital. Corriente Sindical d’Esquierdes, que promovio la esitosa protesta d’esti miércoles, pidió ayeri la dimisión de too l’equipu directivu del hospital y va recurrir a Inspección de Trabayu per tercer vegada tres lo qu’ellos consideren un incumplimientu claru” de los protocolos d’usu d’equipos de protección. Al so xuiciu, en Cabueñes nun se tán cumpliendo por obligar al personal a siguir forníos mientres hores y ensin apenes oportunidá de descansu.