- Venti xixoneses van formar parte de la segunda edición d’esti programa que busca fomentar la igualdá d’oportunidaes dende la perspectiva empresarial.
El programa d’Incorporación Sociolaboral para muyeres del Centru d’Iniciatives Solidaridad y Empléu (CISE), consiste en desenvolver con un grupu de muyeres, acciones integraes de formación, empobinaes al trabayu por cuenta ayena, autoempleo o la busca d’idees de negociu, tratando aspeutos claves de la xestión de negocios que les persones entamadores deben de remanar y de conocer dende l’entamu del procesu empresarial, xuníu a una formación en cocina, concretamente empobinada a trabayar nel sector del catering.
Nesta segunda edición, que cunta cola participación de venti muyeres, escuérrese l’oxetivu de que puedan “empecipiar un acercamientu para trabayar por cuenta propia, desenvolver les sos idees de negociu y que tengan la conocencia básica para ello”. Tratar de persones desemplegaes qu’amás van cuntar con sofitu formativu para l’empléu por cuenta ayena, tal que esplica Daniel Abruñedo, trabayador social del CISE. Liliana Cardona, de 46 años, lleva dellos meses en paru y apuntóse al cursu “para poder consiguir empléu más fácilmente, ye necesaria la formación amás de la esperiencia”, rellata. Y como ella, una ventena de muyeres qu’aspiren a ameyorar les sos vides.
El cursu, que suma un total de 145 hores, va dar formación a venti muyeres hasta abril. «Plantégase que puedan llegar a asistir hasta cincuenta», envaloró Abruñedo. Ente les materies que se van desenvolver, Pura Gil, directora del CISE, destacó «les capacidaes sociales, la preparación d’entrevistes, la manipulación d’alimentos y l’alquisición de conocencies sobro prevención de riesgos llaborales», como tamién se va incluyir un periodu prácticu de marzu a abril, «si la situación pandémica asina la dexara», indicó.
Nel actu inaugural, celebráu nel Llar de Pensionistes Atalía, la concejala de Bienestar Social y Derechu, Natalia González, resaltó la collaboración de CISE con otres entidaes del ámbitu social: «Tamos sacando’l mayor provechu a un local, que, por motivos de la pandemia, nun puede ser usáu poles persones que davezu lo ocupen, que son les persones mayores». Amás, tomaron parte nel actu de presentación el conceyal Promoción Económica, Empléu, Turismu y Comerciu Local, Santos Tejón, y Clara Sierra, directora xeneral de Mocedá y Diversidá.