Declaración institucional del 8 de marzu, Día Internacional de la Muyer, aprobada por tolos grupos municipales, sacante Vox.
La celebración de la xornada reivindicativa d’esti 8 de marzu, Día Internacional de la Muyer 2021, ta marcada, como toa la nuesa realidá dende va un añu, pola crisis sanitaria, social y económica de la pandemia del coronavirus COVID-19 que tamos viviendo a escala planetaria. Les sos consecuencies tán siendo terriblemente dures para sectores diversos de la sociedá pero, de nuevu, son les muyeres quien les sufren en mayor midida. Consciente d’ello, la Organización de les Naciones Xuníes propunxo para esti Día’l lema “Por un futuru igualitariu nel horizonte de la covid-19”; una propuesta qu’asitia los irrenunciables oxetivos de plena igualdá para les muyeres que güei proclamamos y defendemos na realidá d’un presente que punxo de relieve con especial crudeza hasta qué puntu ye necesariu perserverar nellos y poner los medios para consiguilos cuanto antes.
Per una parte, la pandemia demostró en tol mundu y de forma incontestable la extraodinaria valía y eficiencia del llabor de les muyeres en primer llínea de tolos frentes abiertos mientres esta gran crisis. Facer en terrenes profesionales tan decisivos nesti momentu como’l de la sanidá o la investigación científica, como tamién en tolos sectores llaborales vitales pa los mínimos de bienestar y calidá de vida na nuesa sociedá; aquellos que la so importancia esencial quedó patente mientres les fases más dures de les restricciones y el confinamientu y que solemos arrexuntar sol términu xenéricu de “los cuidos” qu’inclúi tanto aquellos que se dan nel ámbitu de lo privao y por tanto, invisibles, como de lo público, xeneralmente menos valoraos a pesar de la so “esencialidá”.
Asina, el trabayu de les muyeres foi crucial nel ámbitu priváu de los cuidos que significa’l sosten de les estructures familiares y bien especialmente nesti momentu, aquelles cutíes pola enfermedá y les consecuencies, n’otros ámbitos, d’esta crisis de salú que se manifiesta tamién nel deterioru económicu o les necesidaes afeutivu y educativu que surdieron nesta complexa y dura realidá actual. Pero amás, y de resultes de los grandes desequilibrios que persisten na corresponsabilidad, el trabayu de les muyeres tuvo que desenvolvese bien frecuentemente de forma simultánea y cola mesma esixencia ya intensidá nos dos ámbitos: el públicu y el priváu. Esta situación nun ye nueva, pero sí foi más dura.
Asina, la nuesa esperiencia d’anguaño de pandemia hai evidenciado tamién un agravamientu de toles fiendes que siguen torgando’l derechu a una igualdá real y efectivo pa les muyeres y la fraxilidá de la so situación en función del so sexu. La agudización del desempléu, la precarización llaboral, la desigualdá de salarios, l’ausencia nos puestos relevantes de toma de decisiones, la corresponsabilidad mal partida, la violencia contra les muyeres y los sos fíos y fíes mientres les convivencies forzaes pol confinamientu resultaron ser dalgunes de facetes más hirientes de la crisis que toes y toos tamos viviendo, pero que los sos efectos más doliosos nun se parten por igual.
La llucha pola igualdá tien que ser de tola sociedá, de muyeres y homes. Tenemos De construyir una sociedá xusta, social y económicamente desenvuelta que nos dexe avanzar y resolver los actuales problemes. Algamar la igualdá pleno y real ye una batalla qu’hai que ganar los 365 díes del añu y de la que tienen que formar parte tolos sectores que conformen la sociedá, dende los poderes públicos, pasando polos axentes sociales y actores económicos, superando les diferencies partidistes.
D’ende que la Xunta de Voceres, en representación de tolos Grupos Municipales qu’integren el Plenu del Conceyu de Xixón, apruebe esta Declaración Institucional en defensa de la plena igualdá de les muyeres y de l’adopción, cola urxencia que rique’l momentu, de tolos medios institucional y social pa la so consecución nel marcu del nuesu Estáu de Derechu, de los valores y llogros de la sociedá del bienestar y del contestu de les polítiques a escala nacional ya internacional pa consiguilo.
La Corporación reafita amás el so compromisu en ser vanguardia como Conceyu pa desenvolver y aplicar de manera integral y tresversal toles polítiques destinaes a esi oxetivu, y quier tamién qu’esta Declaración faiga públicos ante la ciudadanía la reconocencia y la reivindicación del escepcional esfuerzu de les nueses conciudadanes mientres estos meses, que convida a compartir a tolos vecinos y les vecines de Xixón nesti Día de les Muyeres.
Dende’l plenu convencimiento de que’l papel de les muyeres va ser decisivu na reconstrucción local y global que tenemos per delantre como sociedá y na qu’hemos d’integrar la ética del cuidu como principiu básicu pal bienestar, la igualdá y la xusticia, sumámonos un añu más a les reivindicaciones del Conseyu de les Muyeres de Xixón y comprometemos por integrar la perspectiva de xéneru nes polítiques locales pa impulsar la transversalidad como principiu y ferramienta que nos dexe avanzar na igualdá real y efectivo ente muyeres y homes nel nuesu conceyu.