Nota de prensa
El plazu d’inscripción pa participar nes actividaes programaes por Medio Ambiente, EMA y EMULSA ábrese’l martes 1 de xunu.
El Conceyu de Xixón celebra’l Día Mundial del Mediu Ambiente los díes 5 y 6 de xunu nel Xardín Botánicu Atlánticu. Naciones Xuníes céntrase anguaño na reivindicación de la restauración de los ecosistemes. Con Pakistán como país anfitrión y sol lema “Reimagina, recupera, restaura”, el Día Mundial del Mediu Ambiente 2021 sirve nesta ocasión como altavoz pa esixir acciones urxentes que devuelvan la vida a los ecosistemes estropiaos.
Pa conmemorar esta efeméride, la conceyalía de Mediu Ambiente y Movilidá, cola collaboración de les empreses municipales EMA y EMULSA, entamó un programa d’actividaes que se van desenvolver los díes 5 y 6 de xunu col Xardín Botánicu Atlánticu como escenariu.
Son en total 13 actividaes ente les que s’atopen visites empuestes pa conocer en detalle los distintos biomas d’esti equipamientu municipal, paseos ornitolóxicos a l’amanecida pa identificar les aves qu’añeren nel xardín, talleres p’averase al arte floral xaponés, y talleres infantiles y familiares.
Pa participar nes actividaes ye necesariu inscribise. Les inscripciones pa les actividaes gratuites (visites empuestes y talleres familiares) van poder realizase a partir de mañana martes, 1 de xunu, al traviés del teléfonu 985 18 51 30 o na taquilla del Xardín Botánicu; nel casu de les actividaes de pagu, tendrá de faese al traviés de la web municipal (http://actividades.gijon.es), de la APP Xixón o nes Oficines d’Atención a la Ciudadanía.
Amás, coincidiendo cola celebración del Día Mundial del Mediu Ambiente, el Conceyu de Xixón va apurrir los premios del X Certame de Cuentos y Dibuxos sobro Mediu Ambiente nun actu nel que van participar les neñes y los neños galardonaos y que se va desenvolver el sábadu, 5 de xunu, nel Xardín Botánicu Atlánticu a partir de les 11.30 hores. Mientres l’intre del mesmu, va apurrise tamién el Premiu de Naturaleza Alfredo Noval que concede’l Grupu Ornitolóxicu MAVEA.