- La campaña municipal llanza una llamada a la convivencia, el respectu y la prudencia a la de movenos pela vía pública
El Conceyu de Xixón sigue avanzando na implementación de midíes que favorezan la movilidá activa na ciudá de cara a la nueva normalidá que va empezar esti branu. Movilidá activa, tresporte públicu y movilidá compartida configuren les prioridaes na nueva política de movilidá sostenible del Gobiernu local.
El conceyal de Mediu Ambiente y Movilidá, Aurelio Martín, presentó esta mañana un conxuntu de midíes empobinaes a facilitar y promocionar la movilidá ciclista “non solo pal ociu o’l deporte, sinón como una opción más pa movenos nel día ente día”. L’apueste pola bicicleta como mediu de tresporte pretende un cambéu nos vezos de desplazamientu na ciudá, según el fomentu de vezos saludables y la meyora del mediu ambiente urbano.
Nel actu, que tuvo llugar nel Salón de Recepciones del Conceyu, participaron tamién Marián Mallabibarrena, subjefa provincial de Tráficu, y Luis José Valdés, xefe del serviciu de Formación y Seguridá Vial.
Nesti contestu enmárquense los 29 ciclocarriles anunciaos va unes selmanes, que busquen favorecen la circulación segura de bicicletes y patinetes eléctricos en coesistencia col restu de los vehículos, y que contribúin a aselar el tráficu y faer más seles y segures pa el peatones les cais poles que trescurren.
Agora, la Conceyalía de Mediu Ambiente y Movilidá pon en marcha la campaña “Muévite pol ciclocarril”, qu’en palabres del conceyal “hai d’entendese como una midida de concienciación y sensibilización”, y que busca ameyorar la seguridá vial, espublizar mensaxes y conseyos pa la circulación de ciclistes y usuarios de patinetes, pero tamién de vehículos a motor, y faer un llamamientu a la convivencia, el respetu y la prudencia a la de movenos por cualesquier cai de la ciudá y en cualesquier mediu de tresporte.
La implantación de los 29 ciclocarriles ta desenvolviéndose en paralelu a la creación de nuevos tramos de carriles bici segregaos pa completar la rede ciclista de la trama urbana. El Conceyu tien previstu habilitar dos nuevos tramos n’El Cotu y la cai Mariano Pola.
El desenvolvimientu de nueves infraestructures ciclistes nun ye la única midida. El conceyal de Mediu Ambiente y Movilidá presentó tamién la BiciEscuela Municipal y les actividaes de promoción y sensibilización que se van realizar a lo llargo del añu.
La BiciEscuela Municipal ye un programa pa promocionar l’alquisición de mañes y habilidaes pa circular en bicicleta de forma autónoma, segura y responsable pela vía pública. va poner en marcha la próxima seronda y va tar dirixida a población adulta y a población escolar, afaciendo los conteníos y actividaes a les distintes edaes. La BiciEscuela escolar va desenvolver en 5 centros educativos de la ciudá, y va cuntar tamién con un cursu de formación pal profesoráu y con una guía didáctica de sofitu.
Les actividaes de promoción y sensibilización van completar el plan ciclista presentáu por Martín, con marches ciclistes pa families, campañes informatives, actividaes mientres la Selmana Europa de la Movilidá y el desenvolvimientu d’una xornada técnica de bones práctiques.