Noticia publicada nel diariu El Comerciu’l xueves 17 de setiembre de 2020
El carril derechu de Pablo Iglesias va ser para taxis y autobuses antes de final de mes y en 2021 va haber «plataforma única» en tola cai Covadonga
La Conceyalía de Mediu Ambiente y Movilidá va proponer a los vecinos de Cimavilla tresformar Claudio Alvargonzález nuna cai de plataforma única» -cera y calzada a un mesmu nivel- con un únicu carril de circulación, llindáu a 20 kilómetru per hora y p’usu esclusivu de residentes nel barriu y de vehículos de carga y descarga. Trés meses y medio dempués del so zarru, el conceyal Aurelio Martín repitió ayeri la so intención de que «siga peatonalizada», anque ve posible cuntar con «una vía de serviciu» que dexe a los vecinos siguir saliendo del barriu escontra Fomentu.
La midida escarez entá de fecha y los detalles preven concretase cola asociación vecinal a finales d’esti mes o principios d’ochobre. Mentanto van siguir rixendo les llimitaciones actuales, que torguen la circulación por Claudio Alvargonzález de vehículos de non residentes y solo dexen a los vecinos abandonalo pol Tránsitu de les Ballenes de llunes a vienres, ente los dos de la madrugada y los seis de la tarde.
Per otra parte, Martín señaló que yá se completó la supresión de places d’aparcamientu que taba previstu acometer frente a dellos colexos de la ciudá pal próximu entamu del cursu y que tien como finalidá ampliar les zones d’estancia a la entrada de los mesmos. Fíxose por aciu la instalación de bolardos per parte de Emulsa, empresa municipal responsable de la señalización viaria y que una rematada esa xera va retomar otros encargos de Movilidá.
Per un sitiu, el pintáu de los ciclocarriles (llindaos a 30) entá pindios de señalizar en cais y aveníes como Juan Carlos I, Marqués de San Esteban, Pérez de Ayala y Ramón y Cajal, ente otres. Por otru, la señalización d’un carril bus-taxi a lo llargo de l’avenida de Pablo Iglesias, que va ser el primeru d’una rede de carriles reservaos pal tresporte públicu que’l Conceyu pretende ampliar nel futuru a les aveníes d’Uviéu, Constitución y El Llanu, un tramu de Ezcurdia -dende Castiella hasta’l Grupu Cuadonga- y les cais Brasil y Gran Capitán.
L’actuación de Pablo Iglesias, que se preve tener llista «antes de final de mes», al nun riquir obra física, nun va afectar a les places d’aparcamientu asitiaes a esi llau de l’avenida, a les que podrá siguise aportando. Aurelio Martín indicó amás que ta axustando cola Conceyalía d’Obres Públiques la inclusión nos presupuestos de 2021 d’una partida que dexe construyir una plataforma única» nel tramu de la cai Covadonga que xune San Bernardo y Cabrales, con cuenta de «homogeneizarlo» col que llega hasta la Plazuela. Dende esti branu tou la cai ta cerrada al tráficu, sacante taxis.
Selmana de la Movilidá
Ayeri, nos Campinos de Begoña, inauguróse una esposición de fotografíes de Juan Carlos Tuero y paneles esplicativos sobre les postreres midíes de Movilidá puestes en marcha en Xixón. Ente elles inclúyese la supresión de retranqueos en 17 paraes de EMTUSA, una campaña d’obres que güei llega al tramu de l’avenida de la Mariña d’usu esclusivu p’autobuses que ta asitiáu frente al Hotel Begoña. Los trabayos van obligar a esviar mientres quince díes a partir de Domingo García de la Fonte’l percorríu de les llínees 1, 15, 16, 18, 20 y 26.