El segundu vial, más próximu al paséu marítimu, va sirvir para ganar espaciu piatonal
El Conceyu de Xixón va llindar a un únicu carril de circulación el tráficu na cai Claudio Alvargonzález coles mires d’ampliar l’espaciu piatonal al empar que se caltien una salida del barriu de Cimavilla pola fachada marítima de Fomentu, como solicitara l’asociación vecinal.
D’esta manera, el carril más próximu a la llínea d’edificios va caltenese abiertu al tráficu para dexar la salida de vehículos del barriu al traviés del Tránsitu de les Ballenes en dirección a los Xardinos de la Reina, y el carril amiesto al paséu marítimu va habilitase como zona piatonal.
Esti postreru va poder amás ser utilizáu para carga y descarga nel horariu habitual establecíu, de 7.00 a 13.00 hores, con accesu al traviés del Tránsitu de les Ballenes y non de la Plaza del Marqués como asocedía hasta agora.
Tola cai va ser señalizada como cai residencial S-28 y la velocidá máxima de circulación nun va poder entepasar los 20 km/h.
L’operativu para señalizar la nueva regulación, que s’adopta tres la solución provisional acometida’l pasáu branu, va empecipiase güei y va correr a cargu del serviciu de señalización vial de EMULSA. Va Consistir na instalación de borlados, xardineres y señalética.
Tratar d’una actuación de movilidá táctica que la so afitamientu como obra civil ta condicionada a les conclusiones del concursu d’idees para la fachada marítima, yá convocáu, y al plan de movilidá del barriu, en fase d’ellaboración