El Conceyu de Xixón, al traviés del Patronatu Deportivu Municipal, va poner en marcha la primer edición de les Vacaciones Deportives de Selmana Santa, una iniciativa empobinada a neñes y neños d’ente 4 y 16 años cola que se busca promover vezos de vida saludables dende edaes tempranes, y favorecer la conciliación familiar mientres los díes non lectivos.
El conceyal d’Actividá Física y Deporte, Ramón Tuero, presentó esta mañana la ufierta d’actividaes que suma un total de 11 disciplines, en distintos equipamientos deportivos.
Van llevar a cabu campus multideportivos n’El Llanu, El Cotu y La Calzada mientres los díes 29, 30 y 31 de marzu n’horariu de mañana, con 54 places disponibles. Amás, van impartise cursos de vela, surf, piragüismu y deportes de raqueta. Nes piscines municipales van realizase aquacuentos, gymkanas acuátiques y clases de junior aquadance. A lo último, en collaboración col Club Hípicu Ástur, va haber clases d’equitación de ponis y caballos.
En total, van ufiertase más de 220 actividaes a escolares de la ciudá que, tal que señaló’l conceyal, vieron amenorgaes les oportunidaes de practicar deporte por cuenta de la actual crisis sanitaria. Por ello fixo fincapié na necesidá de diseñar esti programa d’actividaes en grupos amenorgaos y cumpliendo coles midíes hixénicu-sanitaries.
Les inscripciones van empezar el 17 de marzu y podrán realizase al traviés d’internet, de los Caxeros Ciudadanos, y nes Oficines d’Atención al Ciudadanu por aciu cita previa.