El Conceyu de Xixón recibió’l pasáu vienres pela tarde, al traviés del Rexistru Municipal, la solicitú de llicencia para instalar una estación d’ITV na parroquia de Granda, asuntu sobro’l que, hasta agora, solamente tenía conocencia al traviés de los medios de comunicación.
Asina lo treslladó’l conceyal d’Urbanismu, José Luis Fernández, en respuesta a les entrugues que los grupos políticos de la oposición plantegáron-y na Comisión d’Urbanismu, Promoción Económica y Empléu celebrada telemáticamente esta mañana.
La solicitú de llicencia presentada va acompañada d’un proyectu que, tal que manifestó’l conceyal na Comisión, “va tener que valorase cola normativa na mano, como se fai énte cualesquier otra solicitú de les que recibe’l serviciu de Llicencies”, y a partir d’entós, van realizase los pertinentes informes.
Coles mesmes, aprovechó pa recordar que, tal que recueye’l Plan Xeneral d’Ordenación, aprobáu por tolos grupos políticos, sacantes el PSOE, en xunu de 2018, califica esi suelu como industrial.
Pela so parte, el director xeneral d’Urbanismu, Gonzalo Canga, caltuvo xuna xunta la pasada selmana col presidente de l’Asociación de Vecinos de Granda, Félix López, a quien treslladó’l desconocimientu que, naquel momentu, el Conceyu tenía sobro esti proyectu, más allá de les informaciones apaecíes en medios de comunicación. Dambos se emplazaron a una nueva xunta cuando’l Consistoriu recibiera la solicitú de llicencia y el proyectu.