Nota de prensa, 5 de marzu 2021
El Conceyu de Xixón retiró 27 tonelaes de plásticos agrarios nel primer trimestre de la campaña de recoyida d’esti tipu de borrafes.
Empezó n’avientu, cola instalación de 24 contendores específicos nes parroquies rurales del conceyu, y va rematar el próximu mes. Ye la primer vegada que se pon en marcha esta iniciativa, que se va llevar a cabu una vegada al añu mientres los meses d’ochobre a abril.
L’oxetivu ye que los plásticos de silos, principal desfechu recicláu, sían treslladaos al Consorciu para la Xestión de les Borrafes Sólides d’Asturies (COGERSA) y trataos de forma correcta, facilitando d’esta miente el trabayu de llabradores y ganaderos.
El conceyal de Distritu Rural, Ramón Tuero, destacó la necesidá d’habilitar los distintos puntos de recoyida para facilitar el reciclaje de les borrafes agraries y evitar que sían refugaos de forma incorrecta. Amás, señaló que se da respuesta a una vieya reivindicación de los vecinos de la zona rural, yá que hai más de 200 esplotaciones agrícoles y ganaderes en Xixón.