Xixón, 5 mar (EFE).-
L’alcaldesa de Xixón, Ana González, aseguró que l’autorización para la construcción d’una estación d’ITV en Granda ye una cuestión “técnica” y alvirtió de que nun se puede pidir al gobiernu local que prevarique nun dando’l permisu anque sía posible.
“Nun pueden pidir al gobiernu que prevarique, que se pueda y que digamos que non”, resaltó l’alcaldesa tres les crítiques a la construcción d’una estación d’ITV n’una finca calificada como suelu industrial na parroquia rural de Granda.
L’alcaldesa afirmó qu’hai un Plan Xeneral d’Ordenación (PGO) que diz para qué val esa finca y la concesión de la llicencia al Principáu ye “una cuestión técnica”.
González, qu’indicó que alla nun-y gusta’l PGO y que’l PSOE nun votó a favor, aportunó en qu’hai una norma que diz qué puede faese na finca y los técnicos van faer la valoración que correspuenda.
Per otra parte, afirmó que’l Ministeriu de Tresporte treslladó al Conceyu de Xixón que’l Bancu Européu d’Inversiones (BEI) nun diba financiar el proyectu del plan de víes que se presentó y a pesar de que yera la fonte de financiamientu “más cómodu” agora va haber qu’esquizar “toles víes”.
Esiste la posibilidá de qu’una parte del proyectu pueda financiase colos fondos de reconstrucción europeos pero non al completu pol horizonte temporal, afirmó la rexidora, qu’apuntó que tamién puede haber financiamientu de la vienta de les parceles del “solarón”.EFE