Saltar al contenido
Portada » Últimas Noticias » El Conceyu va abrir a partir del llunes 11 de mayu los campos de golf municipales y los skate park

El Conceyu va abrir a partir del llunes 11 de mayu los campos de golf municipales y los skate park

El Conceyu de Xixón va abrir a partir del llunes 11 de mayu los campos de golf municipales y los skate park de Cimvailla y Los Periconos, solamente para deportistes federaos y cumpliendo coles midíes de seguridá que rique la fase 1 na que, previsiblemente, va entrar el Principáu d’Asturies esi día.

El conceyal d’Actividá Física y Deporte, Ramón Tuero, presentó esta mañana los protocolos d’obligáu cumplimientu que van regular l’actividá nestos espacios al campu, ya incidió en que’l Conceyu quier dir adulces, supeditando les apertures d’instalaciones municipales a que la comunidá autónoma vaya superando les fases y les directrices marcaes poles autoridaes sanitaries.

Nel casu de los campos de golf, los deportistes solamente van poder xugar de dos en dos (en circunstancies normales ye de cuatro en cuatro), en cumplimientu del amenorgamientu del 50% d’aforu, y l’equipamientu (palos, bolses, etc) nun va poder dexase nes taquilles porque van permanecer zarraes. (axúntase protocolu específicu).

Para la práctica del skate, tamién acutada a deportistes federaos, ye obligatoriu l’usu de guantes, caltener la distancia de seguridá de 5 metros y nun tendrá de superar se en nengún casu’l 50% del aforu.

Los skate park van tar abiertos de 10 a 20 hores, y si superara l’aforu establecíu para’l so usu, va establecese un períodu d’usu en sesiones de 90 minutos. Pela so parte, EMULSA va realizar dos desinfecciones al día en caúna d’estes instalaciones.

A partir de la fase 1 van poder abrir les instalaciones deportives al campu, ensin públicu, y única y puramente para la práctica de deportes nos que nun haya contactu. Nesti sentíu, a los campos de golf y skates park que van abrir el llunes 11, van xunise’l llunes 18 el complexu deportivu de Les Mestes, para modalidaes d’atletismu, ciclismu y patinaxe.

De cara a la fase 2, na qu’entraríamos el llunes 25 de mayu, abriríase’l complexu deportivu Llanu- Contrueces para la práctica al campu de tenis y padel, en nengún casu superando los dos xugadores en nengún d’estos deportes.

A partir del llunes 8 de xunu, día nel que podríamos entrar en fase 3, el Conceyu de Xixón, al traviés del Patronatu Deportivu Municipal, preve l’apertura de les piscines municipales, empezando pola de Xixón-Sur.

A lo último, el conceyal reconoció qu’estes midíes son susceptibles de cualquier tipu de cambéu que pueda surdir, tantu a nivel nacional como autonómicu.

X