Saltar al contenido
Portada » Últimas Noticias » «El nuesu compromisu con Tabacalera ye claro por que vea la lluz en 2023»

«El nuesu compromisu con Tabacalera ye claro por que vea la lluz en 2023»

Entrevista publicada n’El Diariu El Comerciu’l Domingu, 8 de payares de 2020

ALBERTO FERRAO CONCEYAL D’EDUCACIÓN Y CULTURA

«Nós nun vamos faer trés planes d’usos distintos. Este ye’l que queremos y el que vamos llevar alantre»

Tres años d’idees cambiantes, el Conceyu presentó esta selmana’l plan d’usos para tresformar l’antigua fábrica de tabacos de Cimavilla en Tabacalera Espaciu de Cultura Contemporanea (TECC), centru que tres una inversión de 20 millones d’euros va combinar zones d’esposición y de creación cultural con un nuevu espaciu escénicu para la ciudá, xuna gran sala de proyecciones, locales d’ensayu para musica, un estudiu de grabación y un área específica para moces, centrada na nueva cultura dixital. Alberto Ferrao (Xixón, 1972) asegura que ye’l proyectu definitivu, al que se va dar l’impulsu económicu necesariu por que pueda ser cuanto antes xuna realidá.

-¿Cuál ye’l referente para esti plan d’usos?

-Ye verdá que vimos lo que se fixo con otres tabacaleras y quiciabes el proyectu de Xixón puede asemeyase al centru internacional de cultura contemporanea de San Sebastián. Pero vamos tener que buscar nuesa mesma personalidá. La que tien Xixón como ciudá y la del propiu edificiu, con tanta hestoria como tien detrás. Tien De amosar la nuesa manera d’entender la cultura.

-¿Qué usos destacaría de tolos que recueye’l so proyectu?

-Destacaría’l conxuntu como tal. Ye un proyectu bien redondu, que va dexar que nel edificiu convivan munchos aspeutos: el percorríu históricu al traviés de los restos y la parte espositiva de la planta baxa; les relaciones intergeneracionales nesa importante Zona Nueva; tol apartáu de creación, que puede nutrir al propiu conxuntu y que va traer xuna esa proyección escontra fuera… La coherencia nel discursu y nel diálogu del edificiu ye lo que lo fai potente.

-¿Aprovéchase daqué del procesu participativu que se punxo en marcha’l pasáu mandatu?

-Esi procesu, tal como se llevó a cabu, nun foi daqué que nos gustara. Pero tenemos de tener en cuenta toa lo fecho y claro qu’incluyimos munchos de los usos que se plantegaben nél.

-¿Cree que s’atienden les necesidaes del barriu?

-Non solo tien qu’atender les necesidaes del barriu, sinón les d’un sector, les de tola ciudá y les del propiu equipamientu. Ta claro que Cimavilla forma parte de la hestoria del edificiu y claro que va tener importancia dientro del barriu.

-¿Pero en qué beneficiaráse el so redolada más próxima?

– Tabacalera va xenerar movimientu, sinergias… Y aportuno nesa capacidá de proxectase escontra fuera y la so permeabilidá para absorber de fora adientro. Por casu, na segunda planta va haber un espaciu polivalente que va dexar allugar charres, esposiciones, diálogos… Non solo va ser un edificiu onde pasen coses, lo que pretendemos ye que la xente siéntase parte del edificiu. Y Cimavilla tien bien claro que Tabacalera ye parte del barriu.

Reestructuración de la rede

-¿Esti plan paezse más al presentáu por Foru o al heredáu de Paz Felgueroso, que se centraba na pinacoteca?

-Foru plantegó munches coses distintes. Y en el so programa electoral creo que volvía a la idea del muséu. Nós tener claro, nun vamos faer trés planes d’usos distintos. El que queremos ye esti y ye el que vamos llevar alantre.

-¿Qué impactu va tener sobre’l restu d’equipamientos culturales?

-Tou va tener que reorientase. Vamos Ver cómo podemos realizar la redefinición de los espacios y equipamientos, para siguir proxectando cultura pero garantizando l’accesu de proximidá que dexa l’actual rede de biblioteques, centros integraos y museos. Tamos estudiando la reestructuración para encaxar esti texíu con Tabacalera, pero hai que tener en cuenta que la covid camudónos la temporalización.

-¿va balerase por casu de fondos la Casa Natal de Xovellanos?

-Yá diximos delles vegaes que la reordenación va afectar a la Casa Natal. Pel momento alluga la pinacoteca y cuando faigamos esa reestructuración de tolos equipamientos, y por tanto de los museos, vamos analizar cómo reordenar los fondos municipales para da-yos visibilidá. Entá nun ye’l momentu. Pero sí ta claro que los almacenes de Tabacalera van dexar non solo’l caltenimientu de fondos, sinón tamién la so amuesa, porque van ser visitables.

-Presentáu’l plan d’usos, ¿cuálos son los siguientes pasos?

-Llevar a cabu la obra. Redactar un plan para nun faelo sería absurdu. Esperamos empezar l’añu que vien tol proyectu. Hai un claru compromisu por que Tabacalera salga adelantre y que’l centru pueda ver la lluz en 2023.

Cursu escolar

-El cursu escolar empezó con molición pola covid. ¿Cómo ta siendo la incidencia nos centros escolares de Xixón?

-Escasa. Hasta agora hubo 45 aules que tuvieron que tar confinaes, diez d’elles esta última selmana. Y anque lo meyor sería que nun hubiera nenguna, ye un númberu pequenu en relación al total d’aules qu’hai en Xixón. Sabíamos qu’estes situaciones diben asoceder, pero per parte de los centros hubo un gran trabayu na preparación del cursu que dio los sos frutos, con espacios onde s’embriven riesgos. Los protocolos tán funcionando.

-¿Plantegen adquirise filtros que garanticen un aire llimpio nos colexos ensin necesidá d’abrir les ventanes pel hibiernu?

-Lo que nos encamienten les autoridaes sanitaries ye ventilación. Cuanta más, meyor. Ventilar, ventilar y ventilar.

-El FICX ta al volver la esquina. ¿Cómo-y afecten les nueves restricciones del Principáu?

-Yá teníamos previstes toles posibilidaes, porque la situación ye cambiante. Y a la fin va realizase ‘online’. Cola mesma calidá de siempre, pero ‘online’. Y vamos ver si dalguna otra actividá puede realizase o non.

-¿Y qué va pasar con Feten? ¿Ye facederu ensin públicu en directu?

-Ta claro que nes artes escéniques la conexón col especctador ye importante. Pel momento vamos retrasar la so celebración. Nun va ser en febreru. Tamos estudiando llevala a abril o mayu y veremos ver cómo progresa esta situación.