El Conceyu de Xixón va empecipiar el martes, 10 de payares, los trabayos de roza y caltenimientu de la Sienda Fluvial del Ríu Piles. Por cuenta de esta actuación, mientres los cuatro díes que duren los llabores va ser necesariu cortar el tránsitu de viandantes dende los ocho de la mañana hasta los cuatro de la tarde.
El tramu inicial va ser el de sienda qu’escurre dende la Área La Camocha y los Güertos d’Ociu hasta l’entamu del tramu circular de les alisedas pantanoses. El miércoles, 11 de payares, van siguir pol ramal de sienda paralelu a la canal de Los Molinos, dende’l Parque Fluvial hasta l’encruz col Camín del Quemaderu, y el xueves 12 de payares realizará’l tramu que va dende’l camín de Granda a Cabueñes (parque del Caballón) hasta la pasarela piatonal de Vega que crucia la carretera AS-248. A lo último, el vienres van rematar col segmentu que va dende la pasarela piatonal de Vega hasta les instalaciones deportives de La Camocha y el tramu circular de les alisedas pantanoses.
Un equipu d’ente ocho y diez persones van ser los encargaos d’acometer los trabayos con motodesbrozadoras, sopladores y dos tractores desbrozadores.