Un centenar de operarios de EMULSA van trabayar na temporada braniza para caltener la llimpieza de les trés sableres urbanes, los paseos marítimos, les zones de mayor arribación turística, y les d’usu hosteleru y comercial, reforzando los llabores habituales que se caltienen nel cascu urbanu de Xixón.
El Plan de Branu de EMULSA, empecipiáu va una selmanes colos llabores de llimpieza y adecuación de los arenales del Arbeyal, Poniente y San Llorienzo, supon que, de llunes a domingu, un centenar de operarios del Serviciu d’Hixene Urbana de EMULSA van trabayar ente les cuatro de la madrugada y les dolce y media del mediudía n’arenales y paseos marítimos, y con llabores de repasada y caltenimientu ente les trés de tardar y les nueve.
Forníos con camiones, dos tractores con sistema de peñerada pal sable secu, trés peneradores manuales, xuna baldeadora de ceres, 2 barredores automátiques, y un vehículu 4×4 de menor tamañu, van realizar diariamente’l vaciáu de papeleres y contenedores en sableres, el baldéu mecánicu de los paseos y el baldéu manual de les escaleres, l’aráu y peneráu de les trés sableres urbanes, la eliminación de verdín nes escaleres, la recoyida manual de borrafes de la última fola na vera, amás de l’aplicación de productos fungicidas y bactericíes en sable secu, pasareles pa persones con movilidá amenorgada y escaleres.
Amás, n’horariu de tarde, 40 operarios de EMULSA realicen un barríu manual de repasada nos paseos marítimos y en cais turístiques o de gran arribación nel centru de Xixón, el barriu de L’Arena, y les principales aveníes de los barrios (Schultz, Galicia, Arxentina, Brasil, Manuel Llaneza, etc.). Mientres les fines de selmana del branu’l Serviciu de Parques y Xardinos de EMULSA va tener un equipu especial p’atender la llimpieza de les zones verdes nes que se desenvuelven botellones y les árees recreatives urbanes, ente que’l Serviciu de Recoyida de Borrafes refuerza’l so trabayu nocherniegu con un equipu especial pal vaciáu diariu de contenedores nes zones hosteleres y la medría de la llavadura de contenedores.
COLLABORACIÓN CIUDADANA
Pero tou esti trabayu de EMULSA nun va sirvir d’enforma ensin la collaboración de los ciudadanos por aciu pequenos xestos que sumaos consiguen que Xixón caltenga la calidá de vida que toos esfrutamos y amuésese curiosa pa los miles de visitantes.
Utilizar los miles de papeleres, inclusive pa les colillas, que nunca se deben tirar al suelu y menos nel sable de la sablera, los alcorques de los árboles o los sumidorios.
Nun dexar restos de “botellón” nos parques o árees recreatives nin nes cais.
Recoyer los escrementos de perru, depositalos en bolses zarraes meyor nos contenedores qu’en papeleres, y llimpiar con agua les micciones.
Nun dexar bolses de borrafes nel suelu fora de los contenedores, nin depositar oxetos que tienen de llevase a los Puntos Llimpios.
Doblar les caxes de cartón por qu’entren nos contenedores de reciclaje, y si atópense apexaos o llenos llevar eses borrafes a los siguientes más cercanos.
Toos esos pequenos xestos que miles de xixoneses faemos diariamente consiguen que la imaxe de la ciudá sía la que toos deseyamos, pa esfrutala nós y los visitantes, fieles al lema GijónMeImporta.