Dende l’Agrupación Municipal Socialista de Xixón queremos manifestar el nuesu sofitu y solidaridá cola nuesa compañera del Partíu Socialista Obreru Español y vicepresidenta primer, ministra de la Presidencia, Relaciones coles Cortes y Memoria Democrática del Gobiernu de coalición d’España, Carmen Calvo Poyato.
Carmen ye para los y les socialistes un referente políticu pol so defensa de los derechos de les persones independientemente de cuál sía’l so orixe, raza, posición social o política, relixón o condición sexual; ye un exemplu para’l feminismu y para la defensa de la igualdá de xéneru.
Nun podemos aceptar que, dientro de les discrepancies que se dan en toa sociedá sanamente democrática, normalícense actuaciones como la que se vio’l pasáu 19 de febreru na plaza 8 de marzu de Santiago de Compostela, onde una figura cola imaxe de la nuesa compañera apaeció aforcada.
En democracia, la firme defensa de nueses mesmes posiciones tien de dir férreamente acompañada del respetu a quien manifiesten posiciones distintes. Güei más que nunca, frente a quien non solo quieren torgar l’ampliación de nuevos derechos sinón que traten de llindar los que yá tenemos, tenemos de ser exemplu na nuesa capacidá para dialogar y avanzar escontra una sociedá cada vez meyor.
Confiamos qu’asina sía.
Agrupación Municipal Socialista de Xixón.