XIXÓN, 31 Jul. (EUROPA PRESS) –
L’alcaldesa de Xixón, Ana González (PSOE), destacó esti vienres l’alcuerdu que lleva la Federación Española de Conceyos y Provincies (FEMP) axustando dende va meses col Ministeriu de Facienda, por que los conceyos puedan aportar al remanente, un dineru que por Llei dende 2012 ta llindáu’l so usu.
González, en declaraciones unviaes a los medios de comunicación, aportunó en que l’alcuerdu al que se ta llegando abri una vía para tener accesu a esos remanentes, daqué positivu teniendo en cuenta que sigue vixente una llei del PP que mengua la posibilidá d’acción de los conceyos, al so xuiciu.
L’alcuerdu consiste, según la rexidora xixonesa, en qu’al traviés d’un préstamu que faen los conceyos d’esi dineru al Ministeriu de Facienda van consiguir tener menos déficit, al tar llibre d’él, y que la devolución d’esi dineru sía “en positivu”, esto ye, van recibir más del que s’emprestó.
Punxo d’exemplu que si un conceyu empresta 100 millones d’euros, el Ministeriu devuelve 50 millones en 2020 y en 2021, y nos diez años siguientes 10 millones cada añu. Con ello consíguese, a la so manera de ver, un “plus” bien importante de financiamientu.
Amás, remarcó que lo positivo ye que nun va ser necesariu cumplir la riegla de gastu en 2020 nin en 2021 y asegura participar nos fondos de reconstrucción y nun fondu de compensación del déficit nel tresporte, que beneficiaría a la Empresa Municipal de Tresporte Urbanu de Xixón (Emtusa).
A esto sumó un compromisu para un cambéu nes lleis que’l PP punxo en marcha y que son “tan regresives y antimunicipalismo”, sostuvo.
Ye más, cuntó que paez-y un mizcu fuerte” xubise al municipalismo quien fixo estes lleis y nunca les camudó a pesar de tar 7 años nel Gobiernu, con alusión al PP.