XIXÓN, 4 (EUROPA PRESS)
L’Academia de la Llingua Asturiana y el CONCEYU DE XIXÓN roblaron un nuevu conveniu, ensin naturaleza económica, onde se recueye la collaboración na normalización social del asturianu y l’asesoramientu llingüísticu de l’Academia al Conceyu.
Dambes instituciones empezaron la llexislatura con un alcuentru ente’l so máximos representantes onde pudieron repasase y valorar les últimes meyores na normalización social del asturianu dientro de l’acción del Conceyu. Naquella ocasión, estudiáronse delles propuestes pa desenvolver a lo llargo del ciclu políticu actual y apautaron les bases del documentu qu’acaben de cerrar.
La collaboración, que nun tien naturaleza económica, supon l’asesoramientu de l’Academia de la Llingua Asturiana al Conceyu y la coordinación ente dambes entidaes na política de normalización social.
Per otru llau, l’Academia caltien el so representante nel Conseyu Asesor de la Llingua y va tar representada tamién nos xuraos y premios lliterarios convocaos pol CONCEYU DE XIXÓN pa la promoción del asturianu.
Amás, el Conceyu comprometióse a siguir completando la rotulación n’asturianu del so servicios y dependencies, lo mesmo que de la rede viaria del Conceyu, igual na zona urbana que nel rural.
Per otru llau, l’Academia, a pidimientu del Conceyu, va ufiertar propuestes normatives nesti ámbitu y va aconseyar y va revisar el trabayu de recoyida de la toponimia xixonesa pa la edición de los folletos de les 19 parroquies qu’entá queden por estudiar.