Xixón, 6 ago (EFE).-
L’alcaldesa de Xixón, Ana González, encamentó esti xueves siguir l’exemplu de fortaleza y de voluntá de serviciu públicu de Gaspar Melchor de Xovellanos para superar el momentu difícil” pola COVID-19.
Nel discursu que pronunció nel actu d’homenaxe a Xovellanos al conmemorase l’aniversariu del regresu a la ciudá natal un 6 d’agostu de 1811, González dixo que la so obra tien de sirvir d’inspiración” de l’actuación política “nun momentu difícil como este”.
L’alcaldesa destacó “el coraxe” y la capacidá para convertir un momentu “tan amargosu” como foi la so detención y la so estancia en prisión en Mallorca mientres más de siete años, “n’una oportunidá para salir fortalecíu”.
Representantes del Principáu d’Asturies, miembros de la corporación municipal y descendiente de Xovellanos asitiaron esti xueves ufriendes florales al pie del monumentu na Plaza 6 d’agostu.
El presidente del Foru Xovellanos, Ignacio García Arango, abogó por caltener los valores morales y el sentíu de la llibertá y de xusticia qu’empunxeron la vida del ilustráu.
El director xeneral de Cultura y Patrimoniu del Principáu d’Asturies, Pablo Llión Casalla, reivindicó la memoria de Xovellanos y destacó la so “clara vocación de serviciu públicu”.
L’actu d’homenaxe a Xovellanos tuvo marcáu pol fallecimientu de la vocera del grupu de Podemos-Equo nel Conceyu de Xixón, Yolanda Huergo, y empezó con un minutu de silenciu.