Si la obra nun s’executa anantes de final d’añu, los 900.000 euros conseñaos pa ella van tener que destinase a amortizar delda
El conceyal del Grupu Municipal Socialista, José Ramón Tuero, denunció esta mañana que les obres de la cubierta de Cimavilla “cuerren peligru” por cuenta’l retrasu que fueron xuntando col pasu los meses, sin empezar siquieramente.
Tuero desplicó que, al ser una inversión financieramente sostenible, tien d’entamese anantes de la fin d’esti añu 2019, de lo contrario los 900.000 euros d’esta obra van acabar destinándose a amortización de delda, como esixe la Llei d’Estabilidá Prespuestaria.
El conceyal socialista recordó qu’esta obra foi aprobada por unanimidá nel Plenu d’agostu de 2015, que’l gobiernu de FORU nun empecipió los trámites pa la so contratación hasta setiembre de 2017 y que la obra nun se robló hasta’l pasáu mes d’avientu.
José Ramón Tuero manifestó que, con un plazu d’execución de seis meses, y en viendo’l ritmu qu’imprime el gobiernu municipal a toles obres, los plazos empiecen a correr “de manera peligrosa”.
Poro, el Grupu Municipal Socialista solicitó la comparecencia del conceyal d’Obres, Manuel Arrieta, na próxima Comisión d’Urbanismu, pa que dea esplicaciones sobre los motivos polos que esta obra tovía nun empecipió.
(semeya El Comercio)