Saltar al contenido
Portada » Últimas Noticias » Pineda: “El vial de Jove ye necesariu, pero non puede faese tou al empar”

Pineda: “El vial de Jove ye necesariu, pero non puede faese tou al empar”

Noticia publicada en La Nueva España de Xixón el vienres 30 d’ochobre de 2020.

El PSOE ve “bonos” los Presupuestos del Estáu y l’oposición critica la falta de fondos para’l plan de víes y los accesos a El Musel

“Bonos para Asturies y para Xixón con inversiones importantes y superiores a les incluyíes n’anteriores presupuestos con gobiernu del PP”. Asina ve la socialista Marina Pineda, edil de Facienda, l’impactu del borrador de presupuestos presentáu pol gobiernu de PSOE y Unidos Podemos qu’encabeza’l socialista Pedro Sánchez. N’una visión global Pineda destaca’l compromisu cola variante de Payares y la rede de cercaníes.

Y, yá cola mirada centrada en Xixón, los dineros de “los accesos a El Musel, proyectu d’estrema importancia y, paráu y abandonáu dende va años. Siguimos aportunando na necesidá d’acometer el vial de Jove, pero entendemos que nun se puede faer tou al empar y lo realmente relevante ye que se vaigan desbloquiando proyectos”, El presupuestu asitia unos simbólicos 100.000 euros para’l vial de Jove y 15,2 para’l tramu Lloreda-Veriña. A actuaciones n’El Musel conséñense unos 10,8 millones dientro del presupuestu de Puertos del Estáu.

En cuanto al plan de víes, onde se repiten los daqué más de 300.000 euros d’anguaño para la redacción del proyectu, el gobiernu de Xixón asegura que “2021 tenía de ser l’añu en que s’afixera y cerrara el proyectu d’obra de la estación intermodal, para poder acometer la llicitación de la mesma. Pondremos en contactu col ministeriu, porque’l nuesu oxetivu sigue siendo que s’empecipien les obres de la estación intermodal, que ye lo que Xixón precisa, cuanto antes”.

L’optimismu ye más conteníu dende la representación local del otru sociu del gobiernu estatal. “Nuna primer güeyada, la inversión na ciudá caltiense ya inclusive aumenta, pero vistu lo asocedío otros años lo importante equí ye que se cumplan y execútense les partíes correspondientes. Como exemplu tenemos los 15 años d’espera pol vial de Jove, obra qu’apura y qu’hai que garantizar pa evitar el pasu de los camiones por La Calzada”, esplica Laura Tuero, voceru municipal de Podemos. Aurelio Martín, edil d’IU y miembru del gobiernu de Xixón, ve con “esmolición” les cifres del vial de Jove y el plan de víes. “Nun demuestren el compromisu que creemos que’l Gobiernu central tien de tener con dos infraestructures que son clave pal desenvolvimientu económico y social de la nuesa ciudá, y que s’afaen amás perfectamente a les axendes de sostenibilidá ambiental que con aciertu tán promoviendo”.

La representación política del centroderecha tien munchos más peros que pone-y a les cuentes de Pedro Sánchez y Pablo Iglesias dende una visión localista. “El PSOE vuelve dar el llombu a Xixón y les principales inversiones que precisa la ciudá. El vial de Jove o’l plan de víes quedar en partíes prácticamente simbóliques que lo único que van consiguir ye que se sigan atropando retrasos”, asegura Rubén Pérez Carcedo. El conceyal de Ciudadanos reta a l’Alcaldesa de Xixón, la socialista Ana González, a que “ abandone la so condescendencia y alce la voz contra los continuos agravios del gobiernu de Sánchez a la nuesa ciudá. Nun hai proyectu en Xixón que dependa en daqué del Gobiernu Central que nun s’atope paralizáu nestos momentos”.

Por esa mesma llínea va la reflexón de Jesús Martínez Salvador, vocera de Foro. “Nun hai nenguna intención per parte del gobiernu de Sánchez de cumplir los compromisos d’inversión en Xixón. Apaecen los 100.000 euros d’inversión pal vial de Jove, qu’apaecen cada añu y nunca s’executen, lo cual ye como una chancia pesada”, esplica al forista que tamién incide na falta de compromisu col plan de víes. “Hai una cantidá pa la estación , que ye lo único no que nun hai certidume sobro ónde se va a faer. y nun hai nin un euru pa lo que dixeron que diben faer: entainar el metrotrén, sobremanera nos tramos finales d’allongamientu de Viesques a Cabueñes”, reprocha Martínez Salvador.

Na partida pal plan de víes centra tamién la so desilusión el voceru del PP, Alberto López-Asenjo: “Confírmense los nuesos peores barruntos. Rompióse l’alcuerdu y nun hai intención d’apostar pol plan de víes. El diseñu tres esos 344.000 euros raspia’l trilerismo y l’artificiu contable. Vamos escontra inversiones escaecíes”. Pa Eladio de la Concha, líder de Vox, rescampla que “la mayoría de los proyectos que son importantes pa Xixón van siguir paralizaos. Nin va avanzar el plan de víes nin la Zalia y veremos ver qué pasa colos accesos al Musel. En concencia col de Jove nun cuntamos porque la partida de 100.000 euros ye claramente insuficiente, más bien simbólica, tou d’acordies cola perda del financiamientu autonómicu que cai p’Asturies”.