La Comisión Executiva de l’Agrupación Municipal Socialista de Xixón, na so xunta del 28 de xineru de 2021, aprueba la declaración pola que manifiesta’l so sofitu a la iniciativa d’un grupu de ciudadanes y ciudadanos por que la escampada de Poniente y el paséu del que parte lleve’l nome de Vicente Álvarez Areces.
El nuesu compañeru Tini, referente del socialismu xixonés, tamién lo ye para un conceyu que se camudó sol so mandatu como alcalde, y que dio llugar al Xixón que güei conocemos.
El so llabor y compromisu llevólu a representanos tamién como presidente del Gobiernu del Principáu d’Asturies y, darréu, como senador, siempres cola dedicación y entusiasmu que-y caracterizaron.
Confiamos en que l’Autoridá Portuaria de Xixón conceda a esti espaciu, tan amestáu al llabor de Tini como alcalde, el nome de Vicente Álvarez Areces como amuesa de reconocencia al so destacáu papel na hestoria xixonesa, y n’alcordanza de los importantes cambeos que se dieron en Xixón na década de los 80 y 90 del sieglu pasáu.