Nota de prensa, 29 de xineru de 2021
El Conceyu de Xixón va rescindir el contratu cola empresa axudicataria del estudiu de reurbanización de Cimavilla, y del proyectu de remodelación de les cais del aníu de circunvalación del barriu, énte la previsión d’incumplimientu de plazos. Van Ser los técnicos de la Conceyalía d’Obres Públiques quien van acometer estos proyectos.
Tal que indicó’l Conceyal de Caltenimientu y Obres Públiques, Olmo Ron, na Comisión de Movilidá celebrada esta mañana, la empresa nun cumplió’l plazu d’entrega de los documentos riquíos, que remataba esti mes, y l’apurrida hasta’l momentu ye “escasa y poco refecha”. Por tollo, el conceyal esplicó que s’optó por percanciar el material dispuesto hasta’l momentu pola empresa, y asumir la realización de los proyectos colos medios técnicos de la conceyalía.
L’asistencia técnica, oxetu de la llicitación, tenía de determinar la implantación d’una plataforma única ya identificar o analizar posibles alternatives de trazáu, itinerarios accesibles a llugares onde anguaño nun esistan y llugares d’interés como l’Antigua Fábrica de Tabacos, Casa Paquet, Colexu Honestu Batalón, les pistes deportives, etc.
Tamién tenía d’incluyir la proyección de les obres de les cais que van formar l’aníu, al traviés del que se va distribuyir el tráficu rodáu en Cimavilla. Coles mesmes, contemplaba la realización d’otru proyectu, redactáu conforme a criterios de la EMA, que sirviera pa la llicitación de la renovación de les redes de suministru y saneamientu de diches víes.