- El Serviciu de Vixilancia Epidemiolóxica estudia la relación ente un biltu familiar con casos de la cepa británica y otru nel alumnáu de bachilleratu d’un centru d’Avilés.
- Les autoridaes sanitaries llamen a la ciudadanía a utilizar l’aplicación Radar Covid d’alerta d’andaes al traviés de los teléfonos móviles.
- La conseyería pide a les families que cumplan con rigor les midíes de protección y que xixilen el so estáu de salú per si apaecen síntomes compatibles cola Covid-19
La Conseyería de Salú pide a los mozos ente 15 y 25 años de los conceyos d’Avilés, Castrillón, Corvera, Carreño, Gozón y Xixón que llinden de manera bien estricta los contactos y salíes de les sos cases nos próximos díes pa frenar la trasmisión del virus, amás de faer una vixilancia activa del so estáu de salú y de les persones coles que convivan, especialmente si son mayores o con enfermedaes cróniques. Les autoridaes sanitaries encamienten a les families con moces neses edaes de los citaos conceyos a que xixilen el so estáu de salú y énte l’apaición de síntomes compatibles cola covid-19 (fiebre súbito, falta d’aire, tos, ausencia de gustu y olfatu, dolores musculares etcétera) aísllense, llamen al so centru de salú o al númberu de teléfonu 984 100 400.
Coles mesmes, la Dirección Xeneral de Salú Pública estiende esti encamientu a persones d’otros grupos d’edá que tuvieren situaciones d’altu riesgu. El Serviciu de Vixilancia Epidemiolóxica ta estudiando la relación ente un biltu familiar con casos de cepa británica y otru detectáu nel alumnáu de 2º de Bachilleratu del Colexu Paula Frassinetti d’Avilés, onde se ta realizando un peneráu. Coles mesmes analízase la posible presencia de casos que comparten esta cadena de trasmisión col biltu detectáu nel Real Sporting de Xixón.
La Conseyería de Salú apela a la ciudadanía por que cumpla con rigor les midíes de protección: llavadura frecuente de manos con xabón, usu correctu del mázcaru, caltenimientu de la distancia interpersonal de, siquier, metro y medio, ventilación de los espacios zarraos y el restu d’encamientos pa frenar la trasmisión del virus. Amás, dende la Dirección Xeneral de Salú Pública aconséyase llindar l’actividá social na midida de lo posible, debíu a la medría de la tresmisión del virus n’otres comunidaes vecines.
Aplicación Radar Covid
Les autoridaes sanitaries realicen un llamamientu a la población por que descarguen nos sos teléfonos móviles l’aplicación Radar Covid, xuna ferramienta que facilita’l llabor d’identificación y trazabilidad de posibles contactos que realicen los profesionales d’Atención Primaria y de los servicios de Vixilancia Epidemiolóxica del Principáu. Esta tecnoloxía dexa comunicar a los sos usuarios, ensin revelar la so identidá, un diagnósticu positivu y alvertir de la posible esposición al virus a otros usuarios con quien se rellacionaren.