La campaña vase distribuyir por plataformes d’audiu online, TV, redes sociales, medios de comunicación online, revistes especializaes y soportes d’esterior.
La publicidá va dir dirixida a Galicia, Euskadi, Castiella y Llión, Madrid, Sevilla, Málaga, Cantabria, Navarra, La Rioxa, Estremadura, Cataluña, Valencia, Alicante y Murcia. Tamién s’inclúin acciones en Francia y Portugal.
XIXÓN, 14 de mayu de 2021.- «Xixón, con ganes de ti”. Asina se presenta nun nuevu spot publicitariu la ciudá asturiana de cara a atraer turistes una vegada que se llevantó l’estáu d’alarma y el zarru perimetral de la comunidá autónoma. El nuevu spot de Xixón Turismu busca amosar que la ciudá, y la so xente, yá ta llista para acoyer al visitante y cómo el sector turísticu prepárase para recibir a los as turistes: agospiamientos, restauración, turismu activu, llimpieza, caltenimientu, museos, xardinos, sableres, cultura…
“Nel nuevu vídeu queríamos apostar les persones. Ta claro que lo que los y les turistes busquen anguaño ye la hospitalidá, l’optimismu y la cercanía”, comenta Santos Tejón Llaneza, conceyal de Promoción Económica, Empléu, Turismu y Comerciu Local de Xixón.
El vídeu tuvo en cuenta l’impactu de la COVID-19 y vase a dirixir a los segmentos de turismu prioritarios establecíos nel nuevu Plan de Marketing de Turismu 2021-2024: turismu mariniegu; turismu de congresos; turismu familiar; gastronomía; naturaleza; turismu activu; cultura y hestoria.
El nuevu spot va emitise hasta’l 31 de mayu a nivel nacional al traviés de plataformes online d’audiu (Spotify, Youtube Music, Soundcloud), TV (MiTele, AtresPlayer, TVG, CyLTV, EiTB, Telemadrid y TV3), redes sociales (Youtube, Instagram) y en medios de comunicación online. Amás, van incluyise publirreportajes online en Viaxes National Geographic y Condé Nast Traveler y publicidá esterior en metro y mercaos gastronómicos de Madrid y en Barcelona.
La campaña va empobinada Galicia, Euskadi, Castilla y León, Madrid, Sevilla, Málaga, Cantabria, Navarra, La Rioxa, Estremadura, Cataluña, Valencia, Alicante y Murcia.
Xixón, en toles ocasiones
Yá en xunu, Xixón Turismu va fortalecer la so campaña publicitaria de cara a reimpactar a les persones que vieron el spot y otros anuncios de la fola de mayu y llegar a aquelles persones que tean buscando información para viaxar a Xixón n’Internet. Amás, y coles mires de recuperar al turista internacional, van poner en marcha remanes publicitaries online en Francia y Portugal.
Nesti casu, va reutilizase la creatividá “Xixón/Xixón en toles ocasiones”, protagonizada por Rodrigo Cuevas ellaborada en 2020 y qu’entá se caltien nel imaxinariu del posible turista. “Son munchos años de trabayu en Xixón Turismu y tamos bien asitiaos. Hai que realcontrase col turista, con un turista que yá nos conoz, y hai qu’ufierta-y venceyos emocionales”, comenta Daniel Martínez Junquera, director de Xixón Turismu.
Resultancies
Coles acciones publicitaries previstes pretende xenerase 18,2 millones d’impactos, 46 700 clics a la web de Xixón Turismu y 1,9 millones de visualizaciones completes de los spots.