Tratar del proxecto ‘Ciudaes Conectaes’, presentáu a los fondos europeos Next Generation, del que tamién formen parte Valencia, Vitoria, Fuenlabrada, Logroño y Valladolid
El Conceyu de Xixón participa, al pie de otres cinco ciudaes, na creación de la primer plataforma a nivel estatal para la implantación, desenvolvimientu ya innovación de la movilidá urbana.
Tratar del proxecto ‘Ciudaes Conectaes’, que se presentó esta mañana en Valladolid, y que forma parte de la convocatoria de los fondos europeos Next Generation del Ministeriu de Tresportes, Movilidá y Axenda Urbana, dientro del Programa d’Ayudes a Conceyos para la Implantación de Zones de Baxes Emisiones y el Tresformamientu Dixital y Sostenible del Tresporte Urbanu.
En concretu, Xixón, Valencia, Vitoria, Fuenlabrada, Logroño y Valladolid, van poner en marcha una plataforma dixital que va sirvir para xestionar distintos servicios de movilidá urbana de forma coordinada. Va Ser la columna integradora de tolos servicios de tresporte públicu tradicionales de les ciudaes acomuñaes al sistema, lo mesmo que de los nuevos servicios de movilidá compartida que se vaigan incorporando y que quieran xuntase al mesmu.
N’ese sentíu, les persones usuaries van poder autorizar l’accesu del so vehículu a les Zones de Baxes Emisiones, comprobar l’estáu del tráficu, treslladase n’autobús municipal o arrendar una bicicleta del sistema públicu, en cualesquier de los conceyos participantes. Tou ello podráse realizar ensin el rexistru n’otra plataforma, y van aplicase les tarifes más económiques al tipu d’usuariu y a la forma de desplazamientu, con un únicu métodu de pagu, por tanto, van simplificase los trámites para les y los viaxeros.
Coles mesmes, esta propuesta multi-ciudá en códigu abiertu, para la captación, procesamientu y esplotación de datos de movilidá de forma integrada y interoperable, va centralizar la planificación, estudios y toma de decisiones a tiempu real sobro movilidá nes ciudaes y va dexar planiar viaxes con criterios de sostenibilidá.
Del presupuestu total de Ciudaes Conectaes, que xube a 27’7 millones d’euros, a Xixón correspuénden-y 2’3 millones d’euros. L’alcaldesa de Xixón, Ana González Rodríguez, esplicó esta mañana, nel Conceyu de Valladolid, que la nuesa ciudá va apurrir los datos llograos al traviés de distintos sistemes de captación de datos y conteo y l’esperiencia en tiempu real que xeneren, lo que va dexar implementar un sistema de pagu d’última xeneración nos autobuses; tamién la creación d’un serviciu d’ayuda a la esplotación que dexe captar, xestionar, procesar y compartir datos del tresporte públicu de forma integrada. Per otru llau, va verificar el Test de usabilidad de la mesma plataforma.
González Rodríguez resaltó qu’esta plataforma, única y común pa toles ciudaes, ye un exemplu de collaboración, cooperación y optimización de los recursos de conceyos comprometíos col medioambiente, la sostenibilidá, la calidá de vida. Nesi sentíu, afirmó que la meyora del tresporte públicu, el so usu y la so xestión son xuna prioridá del Gobiernu municipal, un compromisu que se llogró materializar nesti proyectu gracies a la Dirección Xeneral d’Innovación en coordinación cola Empresa Municipal de Tresportes.
L’oxetivu ye, a última hora, que’l tresporte públicu sía más flexible y competitivu pa fomentar el so usu frente al vehículu priváu. Esto traduciráse en menos emisiones contaminantes, mayor eficiencia enerxética nos desplazamientos, menor usu del espaciu públicu y, arriendes d’ello, va amenorgase la siniestralidá.
A lo último, cabo destacar que la plataforma, que’l so plazu d’execución va rematar en xunu de 2024, va dexar la integración del restu de los servicios básicos de tresporte, operaos, xestionaos o rellacionaos cola Alministración Pública correspondiente, como taxis, servicios ferroviarios de calter urbanu ya interurbanu, bus Interurbanu, o bicicleta Pública.