Xixón, 11 sep (EFE).-La ciudá de Xixón va desenvolver mientres los próximos trés años un plan d’intervención n’espacios públicos para recuperar cais y murios como llugares d’esposición d’obres d’artistes urbanos.
La primer fase del proyectu va empezar con cinco obres de diseñadores y grafiteros nos murios allugaos nel antiguu estelleru Naval Xixón, en Ceares, en Poniente, na rotonda de La Guía y nel puertu deportivu.
Estes obres van ser realizaes polos artistes urbanos Sepul, Peter Random, Sak, Bastían y Dados, que tán integraos na asociación cultural Acomuñar.
El programa impulsáu pol Conceyu de Xixón busca ameyorar l’aspeutu d’espacios de la ciudá que davezu son oxetu d’actos vandálicos como espacios para l’arte, según informaron les autoridaes municipales.
L’alcaldesa de Xixón, Ana González, el conceyal d’Educación, Alberto Ferrao y el director de la Fundación Municipal de Cultura, Miguel Barrero, presentaron el proyectu esti vienres nel muelle Lequerica, onde se va realizar unu de los murales.
Tamién van intervenir artistes plásticos n’otros llugares de la ciudá porque se busca combinar distintos llinguaxes amás de reivindicar l’arte urbano de los grafiteros, indicó Barreru.
L’alcaldesa destacó la importancia de dar llugar a les manifestaciones artístiques como un elementu tresformador de la sociedá.