El Conceyu de Xixón tien previstu sacar una nueva llínea d’ayudes para los sectores afectaos pola crisis derivada de la pandemia de coronavirus faciendo usu del dineru ensin executar de la última convocatoria.
Asina lo afirmó’l conceyal de Promoción Económica, Santos Tejón, énte una proposición del grupu municipal de Foro de la que salió adelantre la parte relativa al establecimientu de les midíes organizativas necesaries por que se resuelvan toles solicitúes de llicencia de terraza pindies antes de rematar el mes.
El conceyal, qu’aseguró que tan solo queden 30 pidimientos de concesión de terraza ensin resolver, señaló que’l sector hosteleru sabe que’l Conceyu de Xixón tuvo para escuchar y atender les sos demandes na midida de les sos posibilidaes.
Amás, a falta d’encetar la tema colos axentes de la concertación, el Conceyu preve sacar una nueva llínea d’ayudes col dineru ensin executar na última convocatoria, anque nun ve necesariu ayudes específiques para’l sector del ociu nocherniegu.
Plenu reivindicativu
Asismismo, el plenu del Conceyu de Xixón tamién aprobó xuna proposición na qu’amuesa la so “más atayante condena” a l’agresión” del gobiernu d’Israel al pueblu palestín y pide la lliberación de la cooperante Juana Ruiz Sánchez,
La iniciativa, que salió adelantre col sofitu de PSOE, Podemos ya IU, la oposición de Ciudadanos y l’astención de Foro, PP y Vox, encamienta al gobiernu d’España a condergar l’ataque”, reconocer l’estáu de Palestina y trabayar pol cumplimientu de los resolvimientos de Naciones Xuníes.
Amás, reclama que Naciones Xuníes ponga so protección internacional a Palestina y cree xuna comisión d’investigación sobre los bombardeos israelinos sobre Gaza, de la qu’esixe al Gobiernu d’Israel la retirada militar de los territorios ocupaos.
La concejala del PSOE, Saras Blanco, sostuvo que al pueblu palestín tán frayándo-y los Derechos Humanos. Defendió, amás, qu’esta proposición nun entepasa de les competencies municipales. Aprofió, coles mesmes, que Juani Ruiz nun yera xuna terrorista, sinón xuna cooperante nuna campaña para frenar la pandemia de la COVID-19.