El Conceyu de Xixón caltien l’horariu de visites a los campusantos mientres los díes de difuntos (30 y 31 d’ochobre/1 y 2 de payares), de 9 a 19 hores, pero va llindar l’arribación de visitantes para evitar aglomeraciones, polo qu’encamienta programar les visites en díes alternativos al propiu Día de Difuntos, 1 de payares.
Magar nun se va establecer un tiempu d’estancia máximu nos campusantos, sí encamiéntase que, dada la situación d’emerxencia sanitaria na qu’atopamos, y para facilitar les entraes y salíes de toles persones con fluidez, el tiempu de permanencia nos campusantos sía lo más curtiu posible.
Mientres los díes 30-31 d’ochobre y 1-2 de payares va haber controladores d’accesu nes puertes de tolos campusantos, que van tar señalizaes con cartelos nos que se va indicar la entrada y la salida. Nel casu del de Ceares van abrise les puertes 1, 2, 7 y d’accesu a persones con movilidá amenorgada, y en Deva va habilitase la puerta central para la entrada al campusantu, y los dos llaterales para la salida.
Amás de esti controladores, el día 1 de payares va haber vixilantes de seguridá nos campusantos de Ceares, Deva, Jove y Tremañes, por ser los que mayor arribación de visites rexistren.
L’usu del mázcaru ye obligatoriu, según respetar la distancia de seguridá de dos metros ente los visitantes al campusantu, y siguir en tou momentu les instrucciones del personal de CEGISA. Encamiéntase amás caltener les condiciones d’hixene antes y dempués d’utilizar los aseos, fontes o cualquier instalación d’usu común.
Los servicios relixosos suprimiéronse anguaño por orde del Arzobispáu, por cuenta de la crisis sanitaria, y EMTUSA va habilitar les siguientes llínees d’autobuses pa los desplazamientos a los campusantos:
Campusantu Municipal de Ceares: llínea especial el día 1 de payares, con salíes dende la Plaza de la Güelga cada media hora, ente les 9.30 y les 13.30 hores, y les 15.30 y les 18.30 hores.
Campusantu Municipal de Deva: dende’l sábadu 24 d’ochobre hasta’l llunes 2 de payares, la llínea 25 va realizar viaxes a Deva cada hores, dende les 9.30 hores a les 12.30 hores, y dende les 15.30 hores hasta les 17.30 hores. El día 1 de payares va haber tamién un viaxe a les 13.30 hores.