Nota de Prensa, 4 de mayu de 2021
- El programa d’esti branu ufierta más de 450 actividaes y alredor de 10.000 places.
El Conceyu de Xixón presentó esta mañana’l programa d’actividaes que se va desenvolver a lo llargo d’esti branu integráu por Campamentos y Colonies, Vacaciones Deportives, Cultura y Risondera, y Vacaciones Acuátiques, y entamaes peles árees municipales d’Educación y Mocedá, Cultura, Mediu Ambiente, Patronatu Deportivu Municipal, Axencia Local d’Empléu y EMA.
Xixón ufierta esti branu más de 450 actividaes, gratuites y de pagu, dirixíes al públicu infantil, xuvenil y adultu, con un númberu de places que ronda les 10.000.
Tal que yá asocedió’l pasáu añu, y por cuenta de les escepcionales circunstancies aniciaes pola pandemia, el Conceyu adoptó unes midíes xenerales pa garantizar la seguridá y la salú de toos y toles participantes. Ente estes midíes destaquen la firma d’una declaración responsable per parte de les families, la entrega y recoyida de los y les menores per parte d’una única persona, puntualidá nes hores de recoyida y entrega o l’usu de mázcaru (salvo p’actividaes acuátiques o naquellos casos nos que tea contraindicada por motivos de salú debidamente xustificaos).
Dientro del apartáu de Vacaciones y Colonies desenvolveránse vacaciones, colonies, campamentos, campus deportivos, que’l so plazu d’inscripción abrirá’l 13 de mayu. La inscripción nos campamentos urbanos 11×12 va empezar el 17 de mayu y nel casu de les actividaes nel Monte Deva y el Xardín Botánicu, la inscripción va arrincar el 31 de mayu.
El programa de Vacaciones Deportives inclúi cursos y actividaes, que’l so plazu d’inscripción va empezar el 19 de mayu, y natación y Aqua Branu, nes que’l plazu va arrincar el 26 de mayu.
Talleres de ciencia y tecnoloxía, música, teatru y danza, van ser dalgunes de les actividaes que se van desenvolver dientro del programa Cultura risondera, que’l so plazu d’inscripción va empezar el 21 de mayu. Tamién va haber talleres infantiles en museos municipales, que la so inscripción empieza’l 24 de mayu, y talleres de músicos, col entamu de les inscripciones el 4 de xunu.
A lo último, les Vacaciones Acuátiques inclúin actividaes nel Acuariu, col entamu de les inscripciones el 28 de mayu, y tamién actividaes en EMA, que les sos inscripciones van arrincar el 31 de mayu.
Les inscripciones van poder realizase de manera telemática, al traviés de la web municipal www.gijon.es (https://actividades.gijon.es ) o de manera presencial nes oficines d’Atención a la Ciudadanía, por aciu solicitú de cita previa.
Una vegada realizada la inscripción tendrá d’efectuase’l pagu al traviés d’internet, de la APP Xixón, de la rede de caxeros ciudadanos del Conceyu y tamién de la rede de caxeros de Liberbank.