Los vecinos plantegen trés allugamientos para guardar la distancia y les ampas llogren que’l consorciu habilite otru autobús para nun entemecer alumnos
El Comerciu, 2 d’ochobre de 2020
El Conceyu aseguró ayeri que ta estudiando ampliar les paraes de tresporte escolar pa los alumnos de Nuevu Roces. Asina lo tresmitió a los vecinos y a la ampa del colexu Noega, a los que los indicó que va haber, siquier, una más. La respuesta tien llugar dempués del malestar que lleven treslladando les families dende l’entamu de cursu’l día 22 y que desaguó nuna manifestación antieri. Los motivos son dellos. Unu ye la aglomeración de padres y neños nos dos paraes actuales. N’especial, na de Benito Otero, onde para tamién el tresporte urbanu y un autobús de l’alcordada.
L’asociación de vecinos plantegó trés allugamientos, a consultes del director del Noega. La primera, pa ellos la meyor, ye la de l’avenida de Roces, na intersección con Gómez Lozana, onde pa la llínea 15 de EMTUSA y con espaciu pa dos autocares. «Nun habría que faer obres. Podría utilizase yá», indica’l presidente vecinal, Miguel Bernardo. Y otros dos na cai Alicia Concepción, de tresporte urbanu, que podríen ser afeches pal escolar. «Nun se quitar munches places d’aparcamientu».
Mientres los técnicos estudien el meyor allugamientu, la ampa del Noega aseguró ayeri que, dempués de meter por rexistru delles quexes y unviar mails, el Consorciu de Tresporte (CTA) comprometióse a habilitar un autobús más pa poder dixebrar a los neños d’Infantil de los colexos Noega y Nicanor Piñole, qu’agora van xuntos. «Dixéronnos que tien que salir la ufierta a concursu, polo que-yos daremos un ciertu marxe», apuntó la secretaria de la entidá, Liliana Gómez. El director del centru, Arturo Arias, unvió antieri una carta a la conseyera, Carmen Suárez, diciéndo-y que la situación ye «insostenible». Dicir porque neños de dos colexos comparten autobús y ensin plaza asignada, lo que supon «una incongruencia cuando nos dixeron que nel 11×12 non podíen entemecese. L’autocar que vien nun tien places abondes y desque empezó’l cursu hubo trés monitores d’autocar y hasta tuvimos que dir la xefa d’estudios y yo a entamar la ruta un día porque nun había nengunu, colo importante que ye que conozan a los neños y les rutes. L’equipu directivu da la cara, pero son asuntos que nun dependen de nós».