La remunicipalización del percorríu de Castiello Bernueces ta en llínea cola política de recuperación que se vien realizando d’instalaciones pertenecientes al consistoriu xixonés, según esclarió José Ramón Tuero.
Noticia publicada por El Comerciu’l 28 de xineru de 2021
José Ramón Tuero, conceyal d’Actividá Física y Deportes, ufiertó la mañana del 28 de xineru una rueda de prensa tres la so comparecencia énte los grupos municipales en relación al futuru del campu de golf d’El Tragamón, qu’a partir del 7 marzu va pasar a ser xestionáu pol Patronatu Deportivu Municipal.
El conceyal xixonés empezó esclariando que la remunicipalización del percorríu de Castiello Bernueces ta en llínea cola política de recuperación que se vien realizando d’instalaciones pertenecientes al consistoriu xixonés qu’hasta agora taben xestionaes por otres entidaes y clubes deportivos na ciudá.
José Ramón Tuero aprovechó l’actu pa reconocer el llabor del Club Madera III nel campu xixonés, que cunta cola homologación federativa dende 2003 y volvió señalar que los responsables d’esta entidá yeren conocedores de la intención del Patronatu Deportivu Municipal de faese cola xestión deportiva del campu, en rematando’l so contratu d’esplotación en marzu de 2018. D’esa forma va unificar el modelu de xestión del golf municipal, qu’entiende los campos d’El Tragamón y de La Llorea.
Tamién adelantró qu’el so percorríu va ser remocicáu, pa pasar de ser un campu rústico a otru de denomináu curtiu o executivu, tamién con 9 fuexos, más fáciles de xugar y con un diseñu más fayadizu. Esti proyectu cunta col vistu bonu de la Territorial asturiana y de la Federación Española de Golf, que va ser la encargada de realizar el diseñu del nuevu trazáu.
Otramiente, esclarió que cada club de golf tien acomuñáu un campu y que la Madera III va siguir teniendo acomuñada a la so llicencia’l d’El Tragamón, onde van poder siguir realizando les sos actividaes y entamando los sos torneos.
El conceyal de Deportes incidió na rueda de prensa, en respuesta a Foro, qu’El Tragamón nun va pasar a formar parte de nengún parque natural.