La midida va llindar a les deldes contraíes con posterioridá al primer estáu d’alarma, atribuyibles a la pandemia.
Noticia publicada por El Comerciu’l 29 de xineru de 2021
Contraer deldes cola alministración pública atribuyibles a la pandemia nun va ser motivu d’esclusión nes nueves convocatories d’ayudes rellacionaes cola covid que ponga en marcha’l Conceyu. L’equipu de gobiernu almitió ayeri un ruegu presentáu pol conceyal Juan Chaves, de Podemos-Equo, quien destacó que «ye lóxicu pensar que colos zarros y la cayida de la facturación dellos negocios nun pudieren encarar tolos sos pagos, pero son precisamente los que precisen les ayudes».
Una vegada analizada la viabilidá llegal de la midida, va incluyir nes bases de les nueves llínees qu’apruebe’l Conceyu, ente elles la yá anunciada pa compensar polos nuevu zarros a los establecimientos hosteleros qu’escarezan de terraza. A falta d’estudiar la redacción concreta, la intención ye que nun se tengan en cuenta les deldes contraíes con posterioridá a la declaración del primer estáu d’alarma, el pasáu mes de marzu.
Per otra parte, Ciudadanos amosóse ayeri favorable a ampliar a otros sectores la nueva llínea d’ayudes, dempués de que’l Conceyu plantegara incluyir tamién a feriantes y axencies de viaxe y la Fade punxera sobre la mesa otros posibles beneficiarios, como ximnasios, empreses d’eventos y academies. Pidió sicasí que si se aumentar el númberu de beneficiarios aumente tamién la dotación de la convocatoria, «por que la ayuda nun sía tan baxa que se convierta en simbólica más que n’efectiva».