El Futuru de la Formación Profesional n’Asturies foi’l tema central de charrar-coloquiu entamada pola Agrupación Municipal Socialista de Xixón al traviés de la so Secretaría d’Educación y Cultura.
L’alcuentru, presentáu por Arancha Oblanca, secretaria de la área, cuntó coles intervenciones de Javier Cueli, director xeneral d’Enseñances Profesionales del Gobiernu del Principáu d’Asturies y Rafael Bernardo responsable de Formación de FEMETAL.
N’avientu de 2021 aprobóse’l proyectu de Llei Orgánica d’Ordenación ya Integración de la Formación Profesional que trai importantes cambeos. Llega diecinueve años dempués de que, en 2002, aprobárase la llei vixente hasta agora. Y ye que nesti tiempu España quedóse respectu al restu de países de la Organización para la Cooperación y Desenvolvimientu Económicos (OCDE), y anque la medría d’un 18% d’estudiantes de FP nos postreros siete años foi relevante, entá sigue per debaxo de les tases de matriculación media de la organización, que s’asitia nun 29%.
Con esta llei’l Gobiernu pretende amenorgar el desempléu, cuantimás el xuvenil, al traviés de potenciar una caña educativa que tradicionalmente foi apostrada, y ye qu’hasta agora yera considerada la cenicienta del sistema educativu. Munches families nun contemplaben a la FP como una salida formativa y llaboral para los sos fíos y fíes, prefiriendo a cualquier preciu la formación universitaria.
La nueva norma va cuntar con una dotación de 5.474 millones d’euros a esplegar en cuatro años, de los qu’unos 1.550 millones vienen de les ayudes europees. Del total del presupuestu, 850 millones d’euros van destinar a la acreditación de les competencies profesionales adquiríes por aciu la esperiencia llaboral y víes non formales de formación.
La idea ye que millones d’españoles consigan un títulu nos próximos años.
El so papel va ser clave para cubrir hasta 10 millones de places d’empléu n’España d’equí a 2030, según l’últimu informe del Observatoriu de la FP.
Si nun pudisti asistir presencial o telemáticamente, agora puedes aportar a la grabación: