El secretariu xeneral de los socialistes xixoneses, Monchu García, valoró de forma bien positiva la primer xunta de siguimientu del pactu de gobiernu con Izquierda Uunida remarcando que dichos alcuerdos siempres son positivos para la ciudá. Tantu’l socialista como la coordinadora d’IU en Xixón, Ana Castaño, tuvieron d’alcuerdu en que l’oxetivu a día de güei ye impulsar l’acción de gobiernu no que queda de mandatu nun añu que, na so opinión, ye “trascendental”.
García tamién quixo remarcar que tantu PSOE, como Izquierda Unida son “dos fuerces que se faen corresponsables de lo qu’asocede na ciudá” y dambes organizaciones asumen una responsabilidá compartida nel gobiernu de la ciudá ensin tener en cuenta’l númberu de conceyales. “Lo que vien por delantre ye faer un esfuerzu per parte de toos para cumplir el mayor númberu d’oxetivos del pactu”, esplicó García, teniendo siempres en cuenta’l contestu de la ciudá y les situaciones que puedan surdir nel día ente día y que, como se punxo de manifiestu, realidaes como la pandemia van imponiendo.
El secretariu de los socialistes tamién quixo recordar qu’hai cuestiones que se realizaron que nun taben nel alcuerdu de gobiernu, pero que “formen parte de la mesma voluntá de faer una ciudá meyor” que comparten dambes organizaciones. García apuntó que dende’l PSOE esiste la vocación de continuidá nel pactu de gobiernu y tamién la necesidá d’esforciase más na comunicación y nel tratu cola ciudadanía.
Na xunta, García y Castañal tuvieron acompañaos de Begoña Fernández, vicesecretaria xeneral; César González, secretariu d’Organización; Tino Vaquero, secretariu de Política Municipal; Carmen Eva Pérez, secretaria d’Idees, Programes y Estratexa; Marina Pineda, Facienda, Organización Municipal y Personal; y Ana González, alcaldesa de Xixón y, per parte d’Izquierda Uunida, Aurelio Martín, conceyala de Movilidá y Mediu Ambiente y los miembros de la coordinadora local Javier Suárez Llana, Ana García y Adrián Arias.