Esta selmana acoyimos na Casa del Pueblu l’actu «¿Puede nacese nun cuerpu equivocáu?: Diálogu en redol a la Llei Trans, el sexu y el xéneru».
En xunu de 2021 el Conseyu de Ministros aprobó l’Anteproyectu de “Llei para la igualdá real y efectivo de les persones trans y para la garantía de los derechos de les persones LGTBI”, impulsada pol Ministeriu d’Igualdá y el Ministeriu de Xusticia, amuesa’l compromisu del Gobiernu col colectivu, desenvolviendo, garantizando y promoviendo el derechu a la igualdá real y efectivo de les persones lesbianes, gais, trans, bisexuales y intersexuales, lo mesmo que de les sos families, erradicando situaciones de discriminación y asegurando el llibre desenvolvimientu de la so personalidá.
Marín Pérez Álvarez, catedráticu de psicoloxía de la Universidá d’Uviéu, y coautor del llibru «Naide naz nun cuerpu equivocáu», xuntu con José Errasti, profesor titular de la Universidá d’Uviéu, espunxo’l so analís sobro la identidá de xéneru y la teoría queer. “Tener equí esti alderique tan respetuosu ye ensin dulda lo meyor. L’alcuerdu y el desalcuerdu ye toa una oportunidá”, comentó como conclusión.
Pel so llau, Mané Fernández Noriega, vicepresidente de FELGTBI+ plantegó la visión del colectivu ante esta llei que busca garantizar y promover el derechu a la llibertá del colectivu. “La mio conclusión ye que güei empecipiamos equí l’alderique, nunca antes convidárenme a confrontar idees”.
Dambos abrieron un intensu y enriquecedor alderique d’alcuerdos y desalcuerdos.
L’alcuentru, que cuntó cola asistencia presencial y telemática de más de 175 persones, foi presentáu por Eduardo Infante Perulero, secretariu de Formación y Foína Menéndez González, secretaria d’Igualdá de la nuesa Agrupación.
