La ciudá de Xixón recibió güei una gran noticia. El Ministeriu de Tresportes, Movilidá y Axenda Urbana aprobó de manera definitiva l’estudiu informativu qu’alluga la futura estación intermodal en Moreda. Una reblagada adelantre y que supon que’l proyectu pueda siguir avanzando para convertise nuna realidá.
La mesma alcaldesa, Ana González Rodríguez, amosábase güei bien satisfecha énte lo qu’ella calificaba como la “primer pieza del puzzle” para siguir dando pasos adelantre. Bastante ye que, l’aprobación d’esti estudiu supon que la estación va allugar en Moreda, llugar que siempres defendió l’equipu de gobiernu socialista y que demostró ser la meyor opción. Amás d’esto, gracies a l’aprobación publicada güei nel BOE, puede siguise trabayando na planificación del proyectu y de les obres que tienen de realizase.
“Tratar de dir dando pasos seguros y nun faer publicidá. Agora l’oxetivu ye trabayar pa tener cuanto antes el proyectu de la obra y el financiamientu necesariu”
Al respective de los plazos para la realización d’esti proyectu, Ana González prefier ser acordada, dar pasos seguros y comunicalo a les ciudadanes y ciudadanos cuando se vaigan algamando los oxetivos. Sicasí, la mesma alcaldesa de Xixón dexó claro que, anque’l proyectu avanza a bon ritmu, les obres nun van poder empezar entá nesti mandatu.
“Los grupos que siguen aportunando na tema del allugamientu podríen faer la estación. Teníen hasta’l proyectu para faela… y negáronse”
En redol al alderique ensin argumentación que caltuvieron dellos grupos de la oposición, Ana González tamién quixo ser bien clara: “Yo preguntaría-yos ¿ú la estación? Tuvieron ocho años para faela, pero ciertes aventadures y caprichos torgaron que Xixón tenga yá güei la so estación…”